И оттуда дострела есть вдалее до пещеры, и в той пещере лежат мощи многих святых мученик, избиеных въ Иерусалиме во царство Ираклиево; и зовется место то Агаиа Мамила.[169]
ИДЕЖЕ ВЗРАСТЕ ЧЕСТНОЕ ДРЕВО
И от того места до Честнаго Креста есть врьста едина; и есть место за горою, на запад лиць от Иерусалима, и на том месте посечен есть подножекъ Христовъ, на нем же пригвоздиша пречистеи нозе Господа нашего Исуса Христа. И есть место то градом оделано, и посреде града того создана есть церкви велика вверхъ во имя Честнаго Креста, исписана есть добре вся. И под великым олтарем, под трапезою глубоко, и есть пень древа того честнаго. И утвержено есть велми, и покрыто есть над пнемъ тем дъсками мрамора белаго. И оконце проделано противу древу тому, и есть кругло. И то есть манастырь Иверьскый.
О ДОМУ ЗАРЬИНЕ
И от того манастыря до дому Захариина суть версты 4, и есть место то под горою, к западу лиць от Иерусалима. В тот домъ Захариинъ прииде Святаа Богородица в подгорие къ Иелисавефи и целова Иелисавефь. И бысть, яко услыша Иелисавефь целованье Марьино, и взаграся младенець, радущами въ утробе ея, и рече Иелисавефь: «Откуду се прииде ко мне мати Господа моего? Благословена еси в женах, и благословенъ плод утробы твоея».[170] В том же дому Иоаннъ Предтеча родился есть. И есть ныне на месте том создана была церькви вверхъ. Идуще въ церковь ту, на левей руце под малым олтарем есть пещерка мала, и в той пещере родился Иоаннъ Предтеча. И есть место то было оделано градом каменым все.
О ГОРЕ, ИДЕЖЕ БЕЖА ЕЛИСАВЕФЬ СЪ ПРЕДТЕЧЕЮ
А оттуда есть полъверсты чресъ дебрь горы, въ нюже гору прибеже Иелисавефь и рече: «Горо, приими матерь с чадомъ!» И абие разступися гора и приятъ ю. Слуги же Иродовы, иже гна вслед ея, пришедшие до места того, не обретоша ничтоже и возвратишася томлены. И есть место то знати на камени томъ и до нынешняго дне. И есть над местом тем ныне создана церквица мала; исподи под церквицею тою пещерка мала, и церквица другая пред пещеркою тою приздана. Ис тоя пещеры исходить вода добра зело, и ту воду пила святаа Иелисавефь, съ Иоанномъ ту сущи, в горе той; ту бо есть была до умертвия Иродова, аггель бо ю набдяше в горе той. И есть же гора та велика велми и лесъ по ней есть многъ, и около ея дебри суть многи. И есть на запад от Иерусалима; имя месту тому — Орини.[171] В ту же гору вбеглъ Давыдъ пророкъ изъ Иерусалима, от Саула царя.[172]
О РАМЕ
А от тоя горы къ западу лиць есть две верьсте до Рамы, и о той Раме пророкъ Иеремея глаголеть: «Глас в Раме слышанъ бысть, плачь и рыдание во ушию ею, Рахиль плачющюся чад своих и не хотяше утешитися, яко не суть».
