ИДЕЖЕ ПЕТРЪ, ОТВРЬЖЕСЯ ХРИСТА ТРИЖДЫ, ПЛАКАСЯ ГОРКО
И оттуда есть близь паки место на стране горы, къ въстоку лиць, и ту есть пещера глубока велми, слести в ню степеней 30 и 2. И в той пещере плакася Петръ горко отврьжениа своего. И над тою пещерою церковь есть создана во имя святаго апостола Петра.
О КУПЕЛИ СИЛОАМСТЕЙ
А оттуда на полудне лиць доле под горою есть купель Силоамля, идеже Христос слепцю очи отверзе.[142]
О СЕЛЕ СКУДЕЛЬНИЧИ
И ту есть под тою же горою Сионьское село Скудельниче, еже его купиша ценою Христово на погребание странным.[143] И есть об он пол дебри под горою Сионьскою, на югъ лиць от Сиона. И суть пещеры многи на стране горы у камени изъсечены, и в тех пещерах дне суть гроби устроены, у камени изсечены дивно и чюдно; ту ся погребають страньни пришельци туне, так; ничтоже не даютъ отъ места того святаго, искуплено бо есть кровию Христовою.
О ВИФЛЕОМЕ
Вифлеем же святый есть на югь лиць отъ Иерусалима святаго, 6 верстъ вдалее. По полю 2 версте до сседаниа Авраамля, идеже отрока своего остави съ ослятемъ Авраамъ, и поя сына своего Исаака на жертву, и заде ему дрова понести и огнь. И рече ему: «Отче, се дрова и огнь, а кое овча?» И рече ему Авраам: «Богъ покажет, чадо, намъ овча». И идяше Исаакъ, радуяся, путемъ темъ къ Иерусалиму лиць. На том же бо месте приведенъ бысть Исаакъ, идеже Христос распят бысть.
И оттуда есть верста едина вдале до места, идеже святаа Богородица виде двои люди: едины смеющася, а другиа плачющася.[144] И ту есть была церкви создана, манатырь был Святыя Богородица, ныне же разорено есть от поганых.
А оттуде до гроба Рахилина, матери Иосифовы,[145] еста версте 2.
О ВЕРТЕПЕ, ИДЕЖЕ ХРИСТА РОДИ СВЯТАЯ БОГОРОДИЦА
И оттуда верста едина есть до места, идеже ссела святаа Богородица съ осляти, егда понуди сущее въ чреве еа, хотя изыти. И ту есть камень великъ, и на том камени почивала святая Богородица, тогда сседши со осляти; и от того камени, вставши,[146] шла есть пеша до вертьпа святаго, и ту родила есть Христа в том вертьпе святая Богородица. И ту есть близъ Рождество Христово от камени того, яко можеть дострелити добръ стрелець.
О ЦЕРКВИ РОЖДЕСТВА ХРИСТОВА
И есть ту над вертепом темъ святым Рождества Христова создана есть церкви велика крестом, и верхъ ея клетьски въсперенъ. Покрыта же есть вся оловом церкви та Рождества Христова, исписана есть мусею вся, столповъ же имать 8 облых марморяных; помощена же есть дъсками мрамора белаго; двери же имат трои; есть же вдалее 50 сажен до великаго олтаря, а вшире 20 сажен. Есть же вертепъ и асли, идеже было Рождество Христово, под великим олтарем, яко пещера велика, создана красно, и степеней имать 7, куда же слести есть къ дверемъ святаго вертьпа святаго. Имат двери двои, въ других дверий 7 же степеней. И есть, всточными дверми влезучи въ вертепъ, на левей руце есть место на земли доле, и на том месте родился Христос Богъ нашь. И есть надъ местомъ темъ въздълана трапеза святаа, и ту на той трапезе литургисають.
