и есть место то въ потоце глубоко у пути близь на левой руце, тамо идуче. А отъ Кюзивы до Иерихона 5 верстъ, а от Иерихона до Иордана 6 верстъ великых, все поравну въ песце; путь тяжекъ велми. Ту мнози человеци задыхаються отъ зноя и ищезають, от жажи водныя умирають. Ту бо море Седомское близь от пути того: изходит духъ зноенъ смердящь, зноит и попаляеть всю землю ту. И ту есть, недошедше Иордана, близь на пути, монастырь святаго Иоанна Предтечи; и есть горе възделан.
О ГОРЕ ЕРМОНЕСТЕЙ
И ту есть гора Ермонъ близь у манастыря того вдалее яко 20 сажежнь. И есть на левей руце, тамо идучи, у пути близь. И есть песочна горка та не велика, но мала.
А отъ Ермона до ветхаго манастыря Иоаннова вдалее дващи дострелити гораздо. И ту есть была церкви велика создана во имя Предтечи Иоанна.
О МЕСТЕ, ИДЕЖЕ МОРЕ ВИДЕ, ПОБЕЖЕ, И ЕРДАН ВЗРАТИСЯ ВСПЯТЬ
А за олтаремъ тоя церкви близь встоку лиць на пригории есть созданъ яко олтарець и комара мала, и на том месте есть крестилъ Предтеча Иоаннъ Господа нашего Исуса Христа. До того бо места изиде Иордан от ложа своего, возвратився, видевъ Творца своего, пришедша крестится, и убоявся, възъвратися вспять и прииде до того места. И ту есть море Содомьское близь купели тоя было, ныне же есть дале от Крещениа, яко 4 версты вдалеее отбегло. Тогда убо узрев море наго Божество, стоаще в водах Иорданьскых, и убоявся, и побеже; Иордан възвратися вспять, якоже пророкъ глаголеть о том: «Что ти есть, море, да побеже, и ты, Иордане, възвратися вспять?»[107]
О МЕСТЕ, ИДЕЖЕ КРЕСТИСЯ ХРИСТОС
От того, идеже ся крестил есть Христос, есть до самыя реки Иордановы вдале, яко можеть доверечи мужь каменемь малым.
О КУПЕЛИ
И ту есть купель на Иордане, и ту ся куплють христиане приходяще. Ту же есть брод чрес Иордан во Аравию. На томь же месте Иордан раступися древле сыномъ Израилевым, и проидоша людие по суху.[108] Ту же и Елесей удари милотию Илииною в воду, и проидоша Иордан по суху.[109] На той же купели и Мария Египтяныни преиде по водам къ отцю Зосиме, и приятъ тело Христово, и пакы по водам же преиде в пустыню.[110]
О ЕРДАНЪ
Иордан же река течет быстро, бреги же имать об онъ полъ прикруть, а отсуду пологы. Вода же мутна велми и сладка пити, и несть сыти пиюще воду ту святую; ни с нея болеть, ни пакости во чреве человеку. Всем же есть подобенъ Иордан к реце Сновьсей — и вшире, и въглубле, и луково течет и быстро велми, якоже Сновь река.[111] Вглубле же есть 4 сажень среди самое купели, якоже измерих и искусих сам собою, ибо пребродих на ону страну Иордана, много походихомъ по брегу его. Вшире же есть Иордан якоже есть Сновь на устии. Есть же по сей стране Иордана на купели тои яко леси древо не высоко, аки вербе подобно есть, и выше купели тоя по брегу Иорданову стоитъ яко лозие много, но несть якоже наша лоза, но некако аки силяжи подобно есть; есть же и тростие много; болоние имать, яко Сновь река. Зверь мног ту, и свинии дикии бе-щисла много, и пардуси мнози ту суть, лвове же.
