О ВЕСИ ГЕПСИМАИНЕ
Фепсиманиа же есть село, идеже есть гробъ святыя Богородица, близь града Иерусалима на потоце Кидардьстемъ въ Удоле плачевнем, и есть отъ Иерусалима межи встока лиць летнимъ и зимным.
О ВРАТЕХЕ ГРАДНЫХ
И есть от врат градных сажень 8 до места, идеже Охония жидовинъ хоте сврещи тело со одра святыя Богородица, егда несяхуть е погребать апостоли в Гепсиманию. И утя ему аггелъ обе руце мечем, и положи я на нем.[95] И есть на месте том был монастырь женьскый, и ныне же разорено есть от поганых.
О МЕСТЕ ГРОБА СВЯТЫА БОГОРОДИЦА
И оттуда до гроба святыя Богородица есть сажен 100. И есть гробъ Святыя Богородица въ удолне месте: пещерка была мала в камени изсечена, дверци имущи малы, яко можеть человекъ влести наклонься; и во дне в пещере той противу дверцам яко лавица засечена в томже камени пещернемъ, и на той лавици положено бысть тело честьное Пречистыя Владычица нашеа Богородица, и оттуда же взято бысть въ рай, нетленно суще. И есть пещерка та дне мужа възвыше, а вшире 4 лакоть всямокачна, а около теремцем оделана красно мраморными дъсками. А врьху, над гробом святыя Богородица, создана была церкви велика велми клетьски, во имя святыя Богородица Успения; ныне же разорено есть от поганых место то. И есть гробъ святыя Богородица исподи под великим олтаремъ тоа церкви.
О ПЕЩЕРЕ, ИДЕЖЕ ПРЕДАН БЫСТЬ ХРИСТОС
А от гроба святыя Богородица есть сажень 10 до пещеры, идеже преданъ бысть от Июды жидом на 30 сребреницех.[96] И есть пещера та об онъ пол потока Кедарьскаго при горе Елеоньстей.
И ту есть место близь пещеры тоя, яко довержеть человекъ каменемь малымъ, и есть къ полуденью лиць место то, идеже помолися Христос Отцу своему в нощи, в нюже преданъ бысть на распятие июдеем, и рече: «Отче, аще возможно есть, да минеть чаша си от мене».[97] И есть на месте томъ ныне создана церквица мала. А оттуда есть дострела вдалее до гроба Асафатова; и то есть былъ царь июдейскъ и потому зоветься та дебрь Асафатова.[98] И ту есть близь в той же дебри гробъ святаго Иякова, брата Господня.[99]
Елеоньскаа же гора есть от Иерусалима на летний встокъ лиць. От Гепсимании полести есть на гору Елеоньскую высоко велми, яко может на ню 3-жды встрелити едва, но до Отце нашь толко можеть въстрелити от Гепсимании.
О ПЕЩЕРЕ, ИДЕЖЕ НАЧА ХРИСТОС УЧЕНИКЫ СВОЯ УЧИТИ
И ту есть создана церкви велика, и пещера подо олтарем есть исподи; в той пещере Христос научи ученики своя пети «Отче нашь».
