и прочимъ печальмъ, яже апостолъ поминаеть.
Потомь же отвьргъ вься мълъвы и печаль свою на Бога възложь, преже же от ученикъ своихъ посажь дъва попы[235] скорописьця зело, преложи въ бързе вься книгы, вься испълнь разве Макавеи от грьчьска языка въ словеньскъ шестию месяць,[236] начьнъ от марфа месяца, до дъвоюдесяту и шестию дьнь октября месяца. Оконьчавъ же, достоиную хвалу и славу Богу въздасть, дающему такову благодать и поспехъ. И святое възношение таиное съ клиросъмь своимь възнесъ, сътвори память святаго Димитрия.[237] Пьсалтырь бо бе тъкъмо и Евангелие съ Апостолъмь и избьраныими служьбами цьркъвьныими съ философъмь преложилъ пьрьвее. Тъгда же и Номоканонъ, рекъше закону правило, и отьчьскыя книгы преложи.
Пришьдъшю же на страны дунаискыя королю угорьскому,[238] въсхоте и видети, и, етеромъ глаголющемъ и непьщюющемъ, яко не избудеть его без мукы, иде къ нему. Онъ же, яко достоить владыце, тако и приятъ чьстьно и славьно съ веселиемь. И беседовавъ съ нимь, якоже достояше тацема мужема беседы глаголати, отпусти и, улюбль и облобызавъ, съ дары великыими, рекъ ему: «Помяни мя, чьстьныи отьче, въ святыихъ молитвахъ твоихъ присно».
Такоже вься вины отсекъ по вься страны, и уста многоречьныихъ загради,[239] течение же съвьрьши, веру съблюде,[240] чая правьдьнаго веньца. И понеже тако угожь, Богу възлюбленъ бысть.[241] Приближатися начатъ время покои прияти от страсти и многыихъ трудъ мьзду. Въпросиша же и, рекъше: «Кого чуеши, отьче и учителю чьстьныи, въ ученицехъ своихъ, да бы от учения твоего тебе настольникъ былъ?» Показа же имъ единого от известьныихъ ученикъ своихъ, нарицяемаго Горазда, глаголя: «Сь есть вашея земля свободь мужь, ученъ же добре въ латиньскыя книгы, правоверьнъ. То буди Божия воля и ваша любы, якоже и моя». Събьравъшемъ же ся имъ въ Цветьную неделю, вьсемъ людьмъ, въшьдъ въ цьркъвь и немогыи, казавъ благодати цьсаря и князя и клирикы и люди вься, и рече: «Стрезете мене, дети, до 3-яго дьне». Якоже и бысть. Свитающу 3-му дьни, прочее рече: «Въ руце твои, Господи, душю мою вълагаю».[242] На рукахъ иереискахъ почи въ 6 дьнь месяца априля въ 3 индиктъ, въ 6000 и 300 и 90 и 3 лето отъ твари вьсего мира.
Усужьше же и свои ученици и достоины чьсти сътворивъше, и служьбу цьркъвьную латиньскы, грьчьскы и словеньскы сътребиша и положиша и въ съборьнеи цьркъви. И приложися къ отъцемъ своимъ и патриархомъ и пророкомъ и апостоломъ, учителемъ, мученикомъ. Людии же бе-щисльнъ народъ събьравъся, проважааху съ свещами, плачющеся, добра учителя и пастыря: мужьскъ полъ и женьскъ, малии и велиции, богатии и убозии, свободьнии и раби, въдовиця и сироты, страньнии и тоземьци, недужьнии и съдравии, вьси — бывъшааго вьсячьско вьсемъ, да бы вься приобрелъ. Ты же съвыше, святая и чьстьная главо, молитвами своими призираи на ны, желающая тебе избавляи от вьсякоя напасти, ученикы своя и учение пространяя, а ереси прогоня, да достоино зъвания
