Господи, благослови Отьче!
Богъ благъ и вьсемогаи, иже есть створилъ от небытия въ бытие вьсячьская видимая же и невидимая и украсилъ вьсякою красотою, юже къто размышляя помышляи по малу от чьсти можеть разумети и того познати, иже есть сътворилъ сиця дела дивьна и многа, «отъ великоты бо и доброты делъ по размыслу и родитель ихъ мудрьствуеться»,[196] иже поють ангели трьсвятыимь гласъмь и вьси правоверьнии славимъ въ святеи Троици, сиречь въ Отьци и Сыне и Святомь Дусе, еже есть въ трьхъ упостасъхъ, еже можеть къто три лица рещи, а въ единомь Божьстве. Преже бо вьсякого часа и времене и лета, надъ вьсяцемь умъмь и съмыслъмь неплътьскъмь Отьць самъ есть Сына родилъ, якоже рече Премудрость: «Преже вьсехъ хълмъ ражаеть мя».[197] И въ Евангелии рече само божие Слово пречистыими усты, въплъщься на последняя лета нашего ради съпасения: «Азъ въ Отьци, а Отьць въ мне».[198] Отъ тогоже отьца и Святый Духъ исходить, якоже рече самъ Сынъ божиемь гласъмь. «Духъ истиньнъ, иже от Отьца исходитъ».[199]
Сь Богъ съвьрьшь вьсю тварь, яко глаголеть Давидъ: «Словъмь Гос-подьньмь небеса утвьрдишася, и духъмь устъ его вься сила ихъ. Яко тъ рече — и быша, тъ повеле — и съзьдашася»,[200] преже вьсехъ сътвори человека, пьрьсть от земля приемля, от себе душю въдъхнувъ животьныимь дъхновениемь и словесьныи съмыслъ и самовласть, да въведеть въ раи, заповедь заповедавъ ему искусьну: да аще съхранить ю, и пребудеть бесъмьртьнъ, аще ли преступить, съмьртию умьреть от своея воля, а не от Божия веления.
Узьревъ же дияволъ человека тако почьтена и устима на то место, съ негоже тъ своею гьрдынею съпаде, и сътвори преступити заповедь и из-д-рая изгьна человека, и съмьртию осужь. И оттоле устити начатъ неприязнь, блазнити многами къзньми человечьскыи родъ. Нъ не остави Богъ великою милостию и любъвью до коньца человекъ, нъ на коежьдо лето и время избьра мужа и яви людьмъ дела ихъ и подвигъ, да ся темь подобяще, вьси на доброе устили.
Якоже бе Еносъ, иже упова пьрвыи нарицяти имя Господьне. Енохъ же потомь, угожь Богу, преставленъ бысть. Нои правьдьнъ ся обрете въ роде своемь, потопа избысть въ ковьчезе, да ся бы пакы земля напълнила твари Божия и украсила. Авраамъ по разделении языкъ, заблужьшемъ же вьсемъ, Бога позна и другъ ся ему нарече и обетование приятъ, яко: «Въ семени твоемь благословлени будуть вьси языци».[201] Исакъ по образу Христову на гору въ жьртву възведенъ бысть. Ияковъ идолы тьстьня погуби и лествицю виде от земля до небесе, ангелы же Божия въсходяща и съходяща по неи, и въ благословлениихъ сыновъ своихъ о Христе пророчьствова. Иосифъ въ Егупте люди препите, Божии ся явль. Иова Авьситидиискааго правьдьна, истиньна и непорочьна Книгы съказають: искушение приимъ, претьрпевъ же, благостьнъ бысть Богомь. Моиси съ Аронъмь въ иереихъ Божиихъ Богъ фараосовъ наречеся и мучи Егуптъ, Божия люди изведе — въ дьне облакъмь светьлъмь, а въ нощи стълпъмь огньнъмь, и море проби, и проиду по суху, а егуптяны потопи, и в пустыни безводьне люди напои воды и хлеба ангельскаго насыти и пътиць; и глаголавъ съ Богъмь лицьмь къ лицю, якоже
