Единъ же от нихъ светникъ, срациньску злобу всю добре ведыи, въпроси Философа: «Рци ми, гости, како вы Махъмета не держите? Тъ бо есть велми Христа похвалилъ въ своихъ книгахъ, глаголя, яко от девы ся родилъ, сестры Моисеовы, пророкъ зелии: мертвыя въскрешалъ и всяку язю ицелилъ силою великою».[126] Отвеща Философъ к нему: «Да судить нас каганъ. Глаголи же, аще пророкъ есть Махъметъ, како имемъ Данилу веру? Онъ бо рече: „До Христа всяко видение и пророчество престанеть".[127] Сь же по Христе явлеся, како можеть пророкъ быти? Аще бо того пророка наречемъ, то Данила отвержемъ». Рекоша же мнозе от нихъ: «Данилъ, еже есть глаголалъ, Божиемъ духомъ есть глаголалъ, а Махмета же вси вемъ, яко ложь есть и пагубникъ спасению всехъ, иже есть добреишая бляди своя на злобу и студодеяние изблялъ». Рече же пьрвыи светникъ от нихъ къ приятелемъ жидовьскымъ: «Божиею помощию гость сии всю гордыню срачиньскую съверже на землю, а вашю на онъ полъ преверже яко съкверну». Рекоша же къ всемъ людемъ: «Яко же есть далъ Богъ власть надъ всеми языкы цесарю крьстьяньску и мудрость свершену, тако и веру в них. И кроме ея никтоже не можеть живота вецнаго жити. Богу же слава въ векы». И рекоша вси: «Аминь».
И рече Философъ къ всемъ съ слезами: «Братье и отци, и друзи, и чада! Се Богъ дасть всякъ разумъ и ответъ достоинъ. Аще ли есть и еще къто противяся, да придеть и преприть или препьренъ будеть. Иже послушаеть сего, да ся крьстить во имя Святыя Троица. Иже ли не хощеть, азъ кроме есмь всякого греха, а онъ узрить въ дьнь судныи, егда сядеть судиа ветхыи дьньми[128] судити всемъ языкомъ». Отвещаша они: «Несмь мы собе вразе. Нъ помалу, иже можеть, тако велимъ, да ся крьстить волею, иже хочеть, от сего дьни. А иже от васъ на западъ кланяется ли жидовьскы молитвы творить, ли срачиньску веру держить — скоро съмьрть прииметь от насъ». И тако разидошася с радостью.
Крьсти же ся от сихъ до 200 чади, отверьгъшеся мерзостии поганьскыхъ и женитвъ безаконьныхъ. Написа же къ цесарю книгы каганъ сиче: «Послалъ еси, владыко, мужа такого, иже ны сказа крьстьяньску веру, словомъ и вещьми Святую Троицю. И уведехомъ, яко то есть истая вера, и повелехомъ крьститися своею волею. Надеющеся и мы доспети того же. Есме же мы вси друзи и приятеле твоему царству и готови на службу твою, яможе хощеши».
Проважая же Философа, каганъ нача ему дары многы даяти. И не приятъ их, глаголя: «Даже ми, елико имаеши плененыхъ грекъ сде. То ми есть боле всехъ даровъ». Сбравше же ихъ до двоюдесяту и вдаша ему. И иде, радуяся, на путь свои.
