Сице нача являтися девицы оной, ейже имя преди рекохом, икона пресветлая Божия Матери, и веляше ей поити во град и поведати про икону Богородицыну, еяже виде, архиепископу и воеводам, дабы шед выняли образ Пречистые Богородицы от земленых недръ; и место поведа ей, идеже последи обретоша драгаго бисера честное сокровище, чюдную икону Богородицыну. Девица же убо, юна и несмыслена, бояшеся поведати, и абие едва поведа матери своей, мати же глаголы ея ни во что же вменив. И последи же убо в видении не единою являшеся ей пресветлая и чюдная она икона, и веляше ей без сумнения сие видение поведати. Девица же не единою, но и многажды сказоваше матери своей явление чюдные тоя божественыя иконы, веляше ей без сумнения поведати сие видение.
Во един же убо день случися девицы оной, ейже имя выше надписахом, спати в полудне — и внезапу девица обретеся посреди двора своего, в нем же живяше, и абие явися ей чюдная и пресветлая Богородицына икона страшным огненным образом, лучи испущая огнены пресветлы и страшны зело, яко мнетися ей от пресветлых тех луч, сияющих от иконы, сожжене быти. И глас бысть от образа страшенъ, къ девице глаголющь: «Аще убо не повеси глаголъ моих и не поидеши от земленых недръ выняти образа моего, аз же убо имам во иной улицы явитися, или во ином граде, ты же имаши болезнена быти, дондеже и живота зле гонзнеши!»
Девица же, от страшнаго сего видения зело ужасшеся, паде на землю и бысть яко мертва, и лежаше на земли на мног час. И абие возопи велиим гласомъ к матери своей, дабы шед поведала архиепископу и правителемъ града того о чюдней и пресветлей иконе Преблагословеныя Владычицы нашея Богородицы и Приснодевей Марии; и поведа ей вся глаголы реченныя, яже слыша от пресветлыя иконы, и место указуя.
Мати же ея скоро иде во град к воеводам,[32] и девицу пред ними представи, повеле ей, да сама глаголеть, яже о ней содеянная.Девица же поведа им вся глаголы реченныя, яже слыша от причюдныя и великолепныя Богородицыны иконы, и место указуя. Они же убо, неверием одержими о пречестней Пречистыя иконе, о ней же девица поведа, и ни во что же вмениша.
Мати же, прослезився, взем дщерь, иде къ архиепископу, те же предиреченныя поведа глаголы и место указаное ей сказуя, дабы повелел выняти святую Богородицыну икону. Архиепископъ же не внят речем ея и отосла ю безделну. Бе же приход ихъ в седмый час дне, обретоша же чюдный он пресветлый образ Богородицынъ в час вторый на десять, по пожаре на том же лете, месяца июля в 8 день, на память святаго великомученика Прокопия. Бысть же сице.
