Библиотека литературы Древней Руси. Том 12 (XVI век) | страница 23



Что же и неправду любяй, и суда не ищущу права, насиловати же и обидети божиа люди сверепеющу? Яко бешенъ песъ, всехъ хапати начнеть: о сем присно поучяется, да чюже похытить; иных имениа зря, то печялию снедается; въ нощи не уснет мысля, и въ дне домы судий обходит, и яже притяжа, погубляет пакы, и пакы иному отъяти покушается; тысяща на всякъ часъ млъвъ исплъняется, душу темну и зломрачну имея, нравъ, яко ядъ кераста, съхраняа. Не на того ли церкви Божиа присно въпиетъ?! Не к тому ли пророци поемлют, всегда глаголюще: «Богъ отмщениа Господь», — и пакы: «Въздаждь въздааниа гръдым!» — и пакы: «Доколе грешници въсхвалятся?»[32] И въздасть им Господь въздаяние ихъ, и по лукавьствию погубит ихъ Господь Богъ, ибо обидимии присно въпиют на нихъ къ Господу, зверя, а не человека въ очию имуще. На того — яро око Господне, и тому дом от основаниа испровръзается; аще и не въ днехъ его, но чядомъ окааннаго сугубо озлобление вселится.

Сиа ведяще, братие, яко не токмо сиа страдати есть злаа от зависти, и гръдости, и неправды, но и множае сихъ: и пленениа, и запустениа царством, и крови пролитиа, и церквамъ разорение. Ибо Господь Бог и зде сими казнить нас, да великое оно зло душь нашихъ истрясет, грехы глаголю. Аще же не покаряемся Господеви своему и злых не отступаем, не токмо зде казнит, но и вечней муце предаеть. Творящеи же волю Господню и зде и тамо наслажаются.

Ибо и тогда въ искусе мукъ быхомъ сих ради зълъ горкымъ мучителемъ, аще и сии доблествовашя мученици. Въ вере бо благочестиа подвигъ бысть, а не плотскыа въиньства. Но силна Богови на разрушение тврьдем зловерьства! Низлагающе въземлющееся Батыево възвышение повелениа, опленяюще всяко разумение прелщьшихся въ послушание Христово обращение покааниа, мужьствовавше светло великодушьнии и великомудрии, непобедимии страстотрьпци, великых рачителе, большихъ сподобльшии. Велико бо есть възжелети положити душа своя за братию; велие же есть и высоко, еже достойном быти законно пострадати и сподобитися исповедати пред мучители Христа Исуса, Господа нашего и Бога, и умрети благочестне: съцарствовати бо есть сихъ ради Царю веком, нетленному, невидимому, единому премудрому Богу.

Но о мучеником изряднии! Вы же насъ свыше назирайте! Аще бо страдати изволисте церкви ради и за люди отечьства вашего тогда, много паче ныне заступайте церковь и отечьство свое от враговъ навета! Яко дръзновение къ Богу имуще, удобно же и нетрудно вамъ насъ, своя люди, заступати ныне паче, или егда страдасте. Темъже необориму и благостоянну иже в Руси съборную и апостольскую церковь съблюдайте, и хотящая искушениа на насъ быти, грехъ ради наших, своимъ предъстательствомъ преводити, руководьствующе же на неблазненый вечнаго живота блаженный путь Господнихъ повелений, избавляюще нас строптиваго, тръновнаго, греховнаго пути, — яко да вами руководствуеми, потщимся очистити от зависти очеса наша, смиренными и мирными ведущеся. Гръдость же и неправду, душевныа наветникы, целостию умною убивше, правдою душа наша украсимъ и, всяцеми добродетельми цветуще, любовне, въ тихости щедротами нищих умащающеся, ходяще усръдно въ заповедехъ Господнихъ, творяще правду въ страсе Божии, — да тако пребывающе, сущихъ зде золъ пременимся и, будущихъ бесконечныхъ мукъ избавльшеся, — уготованных праведникомъ вечных благъ и мы получимъ и Царствиа Небеснаго насладимся, благодатию и человеколюбиемъ Господа Бога и Спасителя нашего Иисуса Христа, Имъ же и с Нимъ же Богу и Отцу купно съ Святым Благымъ и Животворящим Духомъ, слава и дръжава, честь и покланяние ныне и присно и въ векы веком, аминь.