О, святы́й вели́кий Арха́нгеле Гаврии́ле! Бо́жию Престо́лу предстоя́яй и озаре́нием от Боже́ственнаго све́та осия́нный, ве́дением же непостижи́мых та́ин о преве́чней прему́дрости Его́ просвеще́нный! Всеусе́рдно молю́ тя, наста́ви мя к покая́нию от злых дел и ко утвержде́нию в ве́ре мое́й, укрепи́ и огради́ ду́шу мою́ от искуше́ний прельсти́тельных, и умоли́ Созда́теля на́шего об отпуще́нии грехо́в мои́х. О, святы́й вели́кий Гаврии́ле Арха́нгеле! Не пре́зри мене́ гре́шнаго, моля́щагося тебе́ о по́мощи и заступле́нии твое́м в ве́це сем и в бу́дущем, но при́сно помо́щник мне яви́ся, да непреста́нно сла́влю Отца́ и Сы́на и Свята́го Ду́ха держа́ву и твое́ предста́тельство во ве́ки веко́в. Ами́нь. [16, c. 484
О вели́кий Арха́нгеле Бо́жий Гаврии́ле, ты еси́ благовести́л Пречи́стей Де́ве Мари́и зача́тие Сы́на Бо́жия. Возвести́, мне, гре́шному, стра́шный день мое́й сме́рти и умоли́ Го́спода Бо́га за гре́шную мою́ ду́шу, да прости́т Госпо́дь грехи́ мои́ и не уде́ржат мене́ диа́волы на мыта́рствах. О вели́кий Арха́нгеле Гаврии́ле, сохрани́ меня́ от всех бед и тя́жких боле́зней, да сла́влю всемогу́щаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь. [16, c. 484–485
Небе́сных во́инств архистрати́же, мо́лим тя при́сно мы недосто́йнии, да твои́ми моли́твами огради́ши нас кро́вом крил невеще́ственныя твоея́ сла́вы, сохраня́я нас, припа́дающих приле́жно и вопию́щих: от бед изба́ви нас яко чинонача́льник вы́шних сил.
На Небесе́х зря Бо́жию сла́ву и на земли́ с высоты́ подая́ благода́ть, нача́льниче а́нгелов, му́дре Гаврии́ле, Бо́жия сла́вы служи́телю и ми́ра Боже́ственный побо́рниче, спаса́й, соблюда́й вопию́щия ти: сам бу́ди помо́щник, и никто́же на ны.
Архистрати́же Бо́жий, служи́телю Боже́ственныя сла́вы, а́нгелов нача́льниче и челове́ков наста́вниче, поле́зное нам проси́ и ве́лию ми́лость, я́ко безпло́тных Архистрати́г.
Пресве́тлыя и Честны́я, и Вседе́тельныя, Пренеисче́тныя и Стра́шныя Тро́ицы, ты еси́, архистрати́же, сла́вный служи́телю и моли́твенниче, ны́не непреста́нно моли́ изба́витися нам от вся́ких бед и мук, да зове́м ти: ра́дуйся, покро́ве рабо́м твои́м.
