Тропарь священномученикам, в Херсонесе епископствовавшим, глас 4
Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.
Кондак, глас 2
Светоно́сный день наста́/ па́стырей, епи́скопствовавших све́тло в Херсо́не,/ и́хже воспева́ем пра́здник,/ пострада́вших за Христо́вы о́вцы./ Священному́ченицы, моли́те Пастыренача́льника Христа́/ и нас причести́ десна́го ове́ц стоя́ния,/ да вопие́м вам:/ ра́дуйтеся, свяще́ннии отцы́,/ за Христа́ кровь свою́ излия́вшии.
Величание
Велича́ем вас,/ священному́ченицы Христо́вы Васи́лие, Ефре́ме, Капи́тоне, Евге́ние, Ефе́рие, Елпи́дие и Агафодо́ре,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.
Тропарь Божией Матери ради иконы Ее «Споручница грешных», глас 4
Умолка́ет ны́не вся́кое уны́ние,/ и страх отча́яния исчеза́ет,/ гре́шницы в ско́рби се́рдца обрета́ют утеше́ние,/ и Небе́сною любо́вию озаря́ются све́тло,/ днесь бо Ма́терь Бо́жия простира́ет нам спаса́ющую ру́ку,/ и от Пречи́стаго о́браза Своего́ веща́ет, глаго́ля:/ Аз Спору́чница гре́шных к Моему́ Сы́ну,/ Сей дал Мне за них ру́це слы́шати Мя вы́ну2./ Те́мже, лю́дие обремене́ннии грехи́ мно́гими,/ припади́те подно́жию Ея ико́ны со слеза́ми вопию́ще:/ Засту́пнице ми́ра, гре́шным Спору́чнице,/ умоли́ Ма́терними моли́твами Изба́вителя всех,/ да Боже́ственным всепроще́нием покры́ет грехи́ на́ша,/ и све́тлыя две́ри ра́йския отве́рзет нам,/ Ты бо еси́ предста́тельство и спасе́ние ро́да христиа́нскаго.
Ин тропарь, глас 3
Тебе́, милосе́рдия исто́чнику при́сно теку́щему/ и Спору́чнице гре́шных, недосто́йнии раби́ Твои́, Богоро́дице,/ припа́дающе, скорбя́ще, вопие́м Ти:/ спаса́й нас от бед, Влады́чице,/ и Ма́терним Твои́м хода́тайством испроси́ всем нам ве́чное спасе́ние.
Кондак, глас 1
Честно́е Жили́ще бы́вшее/ неизрече́ннаго естества́ Боже́ственнаго/ вы́ше сло́ва и па́че ума́,/ и гре́шным еси́ Спору́чница,/ подава́вши благода́ть и исцеле́ния,/ я́ко Ма́ти всех Ца́рствующаго,/ моли́ Сы́на Твоего́,/ получи́ти нам ми́лость в День су́дный.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
