Исцеляющие молитвы от всех болезней | страница 75

Приими, о Всеблагословенная и Всемощная, Пречистая Госпоже Владычице, Богородице Дево, сия молитвы, со слезами Тебе ныне приносимыя от нас, недостойных рабов Твоих, к цельбоносному образу Твоему со умилением притекающих, яко Тебе Самей ту сущей, и слышащей моления наша, и подающей с верою просящим по коемуждо прошению исполнение. Скорбящим бо скорби облегчаеши, немощным здравие даруеши, разслабленных и недужных исцеляеши, от бесных бесы прогоняеши, обидимыя от обид избавляеши и гибнущия спасаеши, грешных кающихся прощаеши, прокаженных очищаеши, малых детей милуеши, от уз и темниц свобождаеши, и всякия многоразличныя страсти врачуеши Ты, Госпоже Владычице Богородице: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице Дево Марие! Не престай молитися о нас, недостойных рабех Твоих, славящих Тя и почитающих, и поклоняющихся пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.

(9/22 сентября)

Преподобный Иосиф (Иван Санин) принял пострижение в Боровском монастыре в возрасте двадцати лет. Обладал при жизни даром исцеления. Одно из самых известных чудес, совершенных Иосифом, – оживление юного князя Иоанна Волоколамского, который умер без покаяния. После молитв святого, юноша воскрес. К преподобному Иосифу обращаются при заболеваниях слуха и других тяжелых недугах.

О великий наставниче, ревнителю и учителю православныя веры, святе премудре Иосифе! Приими моление нас, грешных, тебе приносимое, и теплым предстательством умоли в Троице славимаго Бога, да ниспослет богатыя Своя милости нам, грешным, да утвердит во Святой Своей Православней Церкви правую веру и благочестие: пастырем ея да подаст святую ревность о спасении словеснаго стада, яко да верующих соблюдут, неверующих же и отпадших от истинныя веры вразумят и обратят. Нам же всем испроси вся благопотребная во временнем сем житии и полезная к вечному спасению нашему. Помяни стадо твое, еже собрал еси, не забуди посещати чад твоих и, яко чадолюбивый отец, не презри, ниже отрини моления наша, но воздежи руце твои молитвеннеи ко Господу Богу, да отложит праведный гнев Свой, движимый на ны, и избавит нас от враг видимых и невидимых, от глада, потопа, меча, смертоносныя язвы, нашествия иноплеменных и междоусобныя брани. Ей, премилосердый заступниче наш, преславный чудотворче, всех нас управи в мире и покаянии скончати живот наш и преселитися со упованием в блаженная селения райская, идеже непрестанно славословится всепетое имя Отца и Сына и Святаго Духа. Аминь.