Преподобному Кириллу Белоезерскому, чудотворцу
(9/22 июня)
Преподобный Кирилл принял иночество в Симоновом монастыре. Ища уединения, ушел в глухую чащу к берегам Белого озера, где вел жизнь отшельника. В 1397 году построил храм в честь Успения Пресвятой Богородицы. Обладал даром провидения и исцелений. Избавлял людей от инфекционных заболеваний.
Молитва
О, священная главо, преподобне и Богоносне Отче Кирилле! Припадаем к тебе с верою и любовию и просим тя, небеснаго Заступника нашего: яви велие милосердие твое нам, смиренным и грешным, и пролей теплыя молитвы твоя о нас ко Господу Богу. Свойственно есть тебе благосердие, святче Божий, ибо живущу ти на земли, едино бысть у тебе попечение, еже спасати от погибели души человеческия, и вся твоя жизнь святая бысть зерцалом добрых дел, о нихже прославляшеся в тебе Отец Небесный, к Немуже велие дерзновение стяжав, испроси нам у благости Его: веру праву, благочестие нелицемерное, покаяние истинное, братолюбие совершенное и преуспеяние во всех благих делех. Исходатайствуй нам здравие душевное и телесное, земли плодоносие, воздуха благорастворение, мирное и безмятежное житие, непостыдную христианскую кончину и добрый ответ на Страшнем Суде Христовом. Сохрани Церковь Святую и Державу Российскую от браней и нестроений. Огради обитель твою честную от всякаго зла, и вся правоверныя люди, к тебе приходящыя и мощем твоим покланяющиеся, осени небесным твоим благословением, и вся прошения их во благо исполни. Ей, Отче, не презри молитв наших, со умилением тебе возносимых, но буди о нас теплый предстатель ко Господу, и сподоби нас помощию твоею святою спасение вечное получити, и Царствие Небесное унаследовати, да славословим великия щедроты и неизреченныя милости Отца и Сына и Святаго Духа, в Троице покланяемаго Бога, и твое Отеческое заступление, во веки веков. Аминь.
Пресвятой Богородице в честь ее иконы «Калужская»
(2/15 сентября)
Чудотворная икона спасла жителей Калуги от эпидемии чумы, когда врачи ничем не могли помочь людям. В течение трех дней граждане с иконой Богоматери обходили крестным ходом все улицы города и обращались к светлому образу со слезами и мольбами о помощи. Молитва их была услышана – мор прекратился. Пресвятая Богородица Калужская помогает избавиться от вирусных и инфекционных заболеваний.
Молитва первая
О Пресвятая Дево, Мати Христа Бога нашего, Дивная Царице Небесе и земли! Вонми многоболезненному воздыханию сердец наших; призри с высоты святыя Твоея на нас, с верою и любовию предстоящих пред чудотворною Твоею иконою и со умилением молящихся Тебе, Владычице! Не предаждь умалению Церковь Православную, помози нам, Пресвятая Богородице, святоотеческую Православную веру до конца дней наших непорочно сохранити, во всех заповедех Господних неуклонно ходити и избави ны от пагубных душевредных учений. На Твою, Дивная Царице Небесе и земли, милость уповаем, раби Твои: очисти умы наша от греховных помыслов, душевнаго разслабления, обуревания страстей, от искушений, соблазнов и грехопадений; Ты бо еси, Владычице, крепкое прибежище грешников кающихся. Воздвигни нас из глубины греховныя и истинным покаянием ороси изсохшая сердца наша, просвети сердечная очеса наша ко зрению спасения, и прельщенных бесовскою прелестию на путь правый настави; всякое дело злое и богопротивное разруши; всякому же благому и богоугодному делу научи и споспешествуй; вложи, Владычице, в сердца наша дух страха Божия, дух благочестия, дух кротости, смирения, терпения, незлобия; умягчи злая сердца наша и ниспосли нам ревность о спасении ближних наших. Вразуми и научи ны, о Всемилостивая Заступнице наша, како безгрешно ходити по пути земнаго сего жития: яко Ты, Пресвятая, веси веру нашу, и упование наше видиши. О Владычице мира! Скорбящих утеши, бедствующим помози; сохрани от молниеноснаго грома, тлетворных ветр, лютых болезней, смертоносныя язвы, междоусобныя брани, нашествия врагов иноплеменных. О Пресвятая Богородице! Избави ны от внезапныя и насильственныя смерти; всем нам даруй обращение на путь истинный и христианскую кончину живота нашего безболезненну, непостыдну, мирну, Святых Тайн причастну. Во время исхода нашего предстани нам, Дево Богородице, и избави ны от власти бесовския, воздушных горьких мытарств и огня вечнаго. Скончавшимся внезапною смертию милостива быти Сына Твоего умоли, и о всех усопших, иже не имут сродников, о упокоении их Сына Твоего умоляющих, Сама буди непрестанная и теплая Молитвенница и Ходатаица. Преставльшихся же в вере и покаянии от временнаго жития сего отцы, братию, матери и сестры наша сподоби Твоим ходатайством вселитися во обителех Небесных со Ангелы и со всеми святыми, идеже непрестанно гласы празднующих и радостно славящих Пресвятую Троицу, Отца и Сына и Святаго Духа, ныне и присно и во веки веков. Аминь.
