Сих же святых пророков Илию и Еноха призовет Господь, яко рабов Своих, проповедников и мучеников. Бывает же призвание на небо, аще и не во плоти, якоже зде, обаче не единым сим точию, но и прочим святым, якоже в житиях их свидетельствуется. Вопроси убо тех, иже инако о сих пророках и убиении их мысленно, а не чувственно мудрствуют, да скажут они, како убита сия пророка? И аще се есть убито писание, или вера, или закон, то какия три дни и пол лежит мертво? И на какой земли оно лежит? И в каком граде велицем? И на каких стогнах града? И какой дух животен внидет в него? И когда оживет? И како станет не ногах своих? И на каких ногах? И который услышит глас с небесе – взыди семо? И глас сей от какого есть неба? И чесо ради не просто глас, но велий? Како же и почто писанию взыти на небо? И на какое небо? И на каковом облаце? И како по Господню образу? О всех сих выше речено во Апокалипсисе, яже и имут сбытися чувственно на сих пророках Илии и Енохе. Како же сим содеятися мысленно на писании, вере же и законе? Воистину невозможно. Сего ради не возмогут они на сие справедливо отвещати, и согласно и чинно протолковати, но разве развращенно и неподобно, и само на ся ратуемо, а не истинно: зане не возможно истинно отвещати нехотящим истине покоритися. Темже и божественный апостол к таковым под именем галатов глаголет: «О несмысленнии галате, кто вы прельстил есть и не покоритеся истине» (Гал., гл. 3).
От сихубо вышереченных всех светло является, яко и всякому имущему ум можно видети и о пророках и о убиении их, яко то не о законе и не о писании речеся, но о чувственных тех пророках, Илии и Енохе, иже от антихриста убиени быти имут во свое время на кончину времен. Темже и сие знамение являет, яко еще не пришел есть и не царствует антихрист, занеже сии пророцы живи суть и во плоти пребывают даже доселе, и тако пребудут даже до его пришествия. Тогда приидут оба сия пророка со Иоанном (по святому Ипполиту) и возмут времени полседмицы, сиречь дней 1260. И тогда зверь, сиречь антихрист, убиет их, якоже речеся.
Еще ныне нецыи прекословят, глаголюще: аще Илия и Енох даже и доселе живи суть, и приидут, и убиени будут, обаче сие будет на самой кончине мира, а антихрист уже и ныне царствует.
Но да весть истину уразумети хотяй, яко сему быти не возможно, еже бы пророком сим не у пришедшим, и еще не убиенным, антихристу царствовати. Понеже царствование антихристово не будет прежде пришествия сих пророков, о сем тако сказует святый Ипполит, глаголя: «В полседмицы проповедати пророком, и в полседмицы, сиречь в триех летех и пол, царствует антихрист на земли». Зде явственно познавается от сказания святаго Ипполита, яко в первую половину оныя реченныя седмицы проповедати пророком, и убиенным быти от антихриста: потом же вторую половину, сиречь три лета и пол, ему царствовати.
