Выше писано в сей главе из Апокалипсиса, яко град Иерусалим нарицается Содомом и Египтом. Темже да весть хотяй познати, яко тако не просте нарицается, но духовне, зане умножися в нем беззаконие и студодеяние. Сего ради подобно сказует и святый Иоанн Златоустый в Маргарите во втором слове на иудея, приводя во свидетельство пророка Исаию глаголюща: «Услышите слово Господне князи содомстии, внемлите закон Божий людие гоморстии. Не к содомляном ниже в Гоморе живущим беседует, но ко иудеом. Наричет же тех сице, понеже злобы подражанием еже ко онем привлекоша сродство». Нарицается убо град сей Иерусалим градом святым, ради бывших в нем Божиих благодеяний. От исперва обетований ради о нем Божиих к праотцем, и по сих закона ради ветхаго в нем совершеннаго, и пророк и апостол ради бывших в нем, паче же ради страстей Христовых и Креста и погребения, и прочих тайн и дарований Божиих. Нарицается же град сей Иерусалим и Содомом, и Гомором, и Египтом, ради бывшаго в нем людскаго беззакония, и студодеяния и слепоты. И в том убо граде Иерусалиме, а по духовному нарицанию в Содоме и Египте, престол антихристов быти имать, якоже всеми вышеписанными святыми отцы свидетельствуется.
Глаголет же некто: Иерусалимом нарицается Церковь, в ней-же давно уже седит антихрист на своем престоле. Или еще паки ин некто, инако мудрствуя, глаголет: престол антихристов сказует быти в Содоме и Египте, Содом же и Египет бысть уже ныне весь мир за злобу его и беззаконие. Темже и антихрист давно уже прииде и на престол сед царствует в сем Содоме и Египте, сиречь во всем мире.
Отвещаем. Называется в писании Церковь Иерусалимом, и мир сей Содомом и Египтом, однако тамо не о сем речено, но в другом некоем разуме. Сие же во Апокалипсисе не о всем мире и не о Церкви глаголет, но сущем том самем граде Иерусалиме, прирече бо, в немже Христос распят бысть. Мир убо сей во всю вселенную бысть, и Церковь такожде во весь мир распростреся, Христос же распят бысть не во всем мире, и не в церквах, но во едином месте града Иерусалима. Темже не пристойно сице разумети сие на Церковь и на весь мир. Аще бо область антихристова и всюду тогда распространится в мире и в церквах, обаче столица его во едином месте зрится быти, сиречь в том самом граде Иерусалиме, идеже и Христос распят бысть, якоже выше речеся во Апокалипсисе и в прочих книгах.
Инии же святии отцы сказуют о антихристе, якобы он царем будет в старом Риме (якоже выше в первом знамении напомянуся), обаче и таковое сказание не сопротивно есть вышеписанным зде святым отцем. Ибо может быть, яко в Риме прежде начнет царствовати, и потом во Иерусалим приидет, и тамо устанется, якоже повествуется о нем в Книзе Кирилове в толковании на 10-е знамение сице: «А иже на Римское царство, якоже ныне видим, не цари царя избирают, но духовныя духовных на монархию Римскую, на царскую власть света сего прикладают. Иже Божию и святительскую власть в Риме на себе восхитив, и по всему миру расширяют и держат, и предадут оному последнему князю мира сего, иже есть антихристу». Ниже: «И тако с великою нуждею и тягостию приидет ко иудеом, якоже святый Кирил в преди в знамении 11-м пишет». Ниже: «Ведая сопротивнаго величество и смирение благоверных, якоже рече Господь, егда пришед во Иерусалим, тогда сущии во Иудеи да бежат на горы, аще кто слышится силен быти, да ся борет с сатаною, якоже достоит».
