и приимают его в свою ересь. Да что он согрешил, или блуд или прелюбодейство, или ины грех сътворил, то удобь пращают, церковным каноном не последующе. Аще ли пакы кто от православных в обличение въсхощет стати на них про их ересь, и они отметници бывают своих ересей, да и проклинают всех такова творящих, да и ротятся без страха. А сами то творят, да греха себе в той клятве не ставят. Ино как же их мощно было доити, аще бы князь великый не приказал своим бояром со мною, своим богомолцем, того обыскати? И молитвами пречистыа богоматере и его государьскою грозою с его бояры, с Яковом да с Юрьем Захариичи, того есмя обыскали накрепко, да и явьственно то учинили своему государю великому князю, да и отцу своему митрополиту, да и вам, своей братии, архиепископом и епископом. И как мню, ныне вы положили то дело ни за что, как бы вам мнится, Новъгород с Москвою не едино православие; не поболезновали есте о том ни мала! Ты будешь нечто оскорблен от кого в телесном деле, да оставил архиепископью, да предал еси овци влъком на расхищение, а слыша таковую беду церковную. А где бы в то время тръпением великим въоружитися, аще бы что и пострадати за православие душевныя ради пользы, чая от господа бога за то мьзду восприяти! Да понезазриши ми, что есми к твоему боголюбию писал, поминая рекшаго: «Дай премудрому вину, премудрее будет, обличай премудраго, възлюбит тя». Да и се в слух мой пришло, что, деи, посылал по тебе князь великы, и не одинова, и ты, деи, не поехал к нему, а могл бы еси и тамо крепость свою подрьжати, за что будешь оставил архиепископью, а государьское бы еси сердце не ожестил. Да не мни: то мал грех сътворил еси; что ся ни учинит пакость какова христианьству в твоей архиепископии, или бы еси церкви каковую управу учинил в ту пору, ино то все на твоей голове легло. Да однова нечто государь князь великый въспалу учинит и на монастырь тебе же для, ино тебе и за то ответ дати. Да не позазриши ми о том, что есми тебе писал, сердечне жалуя того, что однова от бога за то в гресе будешь. Зане же иной тебе того стыдится млъвити, или и не смеет. А многы люди добрые духовные тому зазрять. А яз то от слуху же слышел. И только то будет так се, и яз совет тебе даю, однова нечто бог положит государю на сердце, пошлет по тебе, и ты бы ся никако не ослушал, тамо пакы приехав к нему. Какову себе крепость хочешь о своем деле, тако учинишь, толко бы ся князь великы у тебе того не опросил. А ныне бы еси о государе о великом князи бога молил, чтобы государю бог положил на сердце, чтобы управил церковь божию, а православное бы христианьство от еретичьскаго нападаниа, от тех еретиков, жидовьская мудрьствующих, непоколебимо было. Понеже образу господа нашего Иисуса Христа и пречистый его матери наругалися! А слышел еси в подлиннике, како о них писано. Да чтобы еси послал по Паисея, да по Нила, да с ними бы еси о том посоветовал: «Преидут три лета, кончается седмая тысяща».
