Кондак 8
Страшное и ужасное бедствие прииде на землю Московскую, егда язвою моровою уязвлены быша людие мнози во градех и весех, и множество их умроша. Тогда собор освященный со инокини молебныя пения вам приношаху и предстательствы вашими избавление от беды получиша, вопиюще благодеющему чрез вас Богу: Аллилуиа.
Икос 8
Вси боголюбцы скорбию велиею объяты быша, егда во дни лихолетий, на землю Российскую пришедших, обитель Покрова Пречистая Девы в Хотькове богоборцы разорению и запустению предаша. Но память о вас, преподобнии, в людех жива бысть, и славляху чада российския житие ваше и чудеса благохвалении сицевыми: Радуйтеся, чудотворцы наши предивныя; Радуйтеся, не оставляющий нас в скорбныя дни.
Радуйтеся, града Хотькова и обители нашея ограждение несокрушимое; Радуйтеся, на враги видимыя и невидимый крепции нам споборницы.
Радуйтеся, благодеяний множество нам источающий; Радуйтеся, милостию сострадания вашего всех объемлющий.
Радуйтеся, приснии всем нам ходатаи спасения; Радуйтеся, неотступнии града Хотькова и обители нашея хранители.
Радуйтеся, преподобнии Кирилле и Марие, блазии о нас пред Богом заступницы.
Кондак 9
Вси Ангели и святых лики радовахуся радостию велиею, егда обитель ваша, преподобнии Кирилле и Марие, Церкви возвращена бысть и мощи ваша честныя, от лет древних Богом сокровенный, в храме соборнем положены бысть. И возженна бяху молитвы лампада и людие вси узревше свет ея удивляхуся зело, к вам в напастех прибегают и помощь от вас получают; еяже и нас сподобите преподобнии, о вас вопиющих Богу: Алл илу на.
Икос 9
Витийство человеческое не довлеет к достойному прославлению чудес от мощей ваших и поныне совершающихся, преблаженнии Кирилле и Марие: старица бо немощная монахиня костное преломление претерпевшая и от врачей не утешанная, к вам, преподобнии, притекше и со слезами моляху вас. Вскоре же исцеление совершенное получив, во умилении сердца воспеша вам: Радуйтеся, благодати Святаго Духа сосуди избраннии; Радуйтеся, радости нам вечныя благоприятнии ходатаи.
Радуйтеся, старицу немощную от недуга скоро исцеливший; Радуйтеся, исцелением сим искусных врачей удивившии.
Радуйтеся, нетленныя благоухающий цветы; Радуйтеся, безсмертия немерцающии лучи.
Радуйтеся, на земли величием чудес блистающим; Радуйтеся, на небеси со Ангелы Бога славящий.
Радуйтеся, преподобнии Кирилле и Марие, блазии о нас пред Богом заступница.
Кондак 10
Спасение вечное унаследовавше, богоблаженнии Кирилле и Марие, душами вашими во обителех горних неразлучно в Бозе пребываете, святыми же мощми вашими во обители Пренепорочныя Девы нетленно вкупе почиваете и обильная исцеления источаете, нас в Горний Иерусалим оный руководствуя, вопиющих того Града Управителю: Аллилуиа.
