А писана в лето 79 августа 11.
Грамота московская.
А се другая с того же вместе, а печати и подписи опрочь собе.
А се за то ялися послове Великого Новагорода к великому князю Ивану Васильевичу всея Руси и к его сыну, к великому князю Ивану Ивановичу всея Руси, по новугородскому слову и по новугородской грамоте, на чем послали к великим князем посадника Ивана Лукинича, посадника Феофилата Захарьинича, посадника Луку Федоровича, посадника Ивана Васильевича, а от житьих Луку Остафьевича, Олександра Клементьевича, Федора Иевлевича, Окинфа Васильевича, Дмитрия Михаиловича.
1. Повелехом суд дати на Городище: от великих князеи боярин судьею, а от Великого Новагорода боярин. Судити им князеи великих человека с новогородцом, а судити им как право, по крестному целованью.
2. А оже ся сопрут о какове деле, а не возмогут управити, и коли будет князь великии в Новегороде, или великого князя сын, или великого князя брат, и тому делу тогда учинить на Городище с посадником конец.
3. А что заклад в рядных грамотах, а то имати великиим князем с владыкого на виноватом от сего докончания.
4. А крюк великим князем по старине на третеи год.
5. А от волостей дар имати по старине.
6. А печати быти князеи великих.
7. А виры имати князем великим по старине, а новогородцом не таити.
8. А с новоторжцев и с демонцов князи великие целованье сложили.
9. А что серебро и хлеб великим князем в Торжку или на губах, а то великим князем не надобе.
10. А кто будет на поруце дан в серебре или в хлебе, в с тех порука доловь; а что собрано, а то великим князем, а Новугороду о том на новоторжцев нелюбия не держати, ни мщатися им ни коею хитростью.
11. А что воина была князеи великих над новгородскими волостьми, или новогородская воина была над великих князеи волостьми, тому всему погреб.
12. А после сего крестного целования аже доспеется воина с обе половине, а не ведая сего докончания, иманое назад отдати со обе половине.
13. А учинится мертвои, а почнут клепати мертвыми или грабежом с обе половины, ино суд тому на Городищи перед теми судьями.
14. А суда нам у великих князеи наместникове не отнимати, опроче ратные вести, или коли имут город делати, без хитрости.
15. А вечным грамотам не быти.
16. А в Вотцкую землю слати князем великим ежегод по старине.
17. А коли приведется князем великим взяти чернои бор, и нам черном бор дати по старине.
18. А позов по волостем новогородским позывати позовников великих князеи да новугородским; а в городе позывати князеи великих подвоискои, а новугородцкои подвоискои также.
