Память всех, в посте просиявших
Тропарь, гл. 4 Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.
Кондак, гл. 8 Яко благочестия проповедники, и нечестия обуздатели, Богоносных собор уяснил еси, подсолнечную осиявающия в мире совершенном: тех молитвами Тебе славящия и величающия сохрани, поющия Ти, Господи, аллилуиа.
На литургии
Прокимен, гл. 4: Восхвалятся преподобнии во славе и возрадуются на ложах своих.
Стих: Возношения Божия в гортани их, и мечи обоюду остры в руках их.
Аллилуиа, гл. 2: Насаждени в дому Господни, во дворех Бога нашего процветут.
Причастен: Радуйтеся, праведнии, о Господе, правым подобает похвала.
Тропарь: воскресен гласа
Кондак, гл. 6
Премудрости наставниче, смысла Подателю, немудрых Наказателю и нищих Защитителю, утверди, вразуми сердце мое, Владыко: Ты даждь ми слово, Отчее Слово, се бо устне мои не возбраню, во еже звати Тебе: Милостиве, помилуй мя падшаго.
На литургии
Прокимен, гл. 8: Помолитеся и воздадите Господеви Богу нашему.
Стих: Ведом во Иудеи Бог, во Израили велие имя Его.
Аллилуиа, гл. 6: Благо есть исповедатися Господеви и пети имени Твоему, Вышний.
На вечерни
Прокимен, гл. 8: Не отврати лица Твоего от отрока Твоего, яко скорблю, скоро услыши мя: вонми души моей и избави ю.
Этот прокимен поется и в неделю 2 и 4 Четыредесятницы
Молитва св. Ефрема Сирина
Господи и Владыко живота моего, дух праздности, уныния, любоначалия и празднословия не даждь ми (поклон).
Дух же целомудрия, смиренномудрия, терпения и любве даруй ми, рабу Твоему (поклон).
Ей, Господи Царю, даруй ми зрети моя прегрешения и не осуждати брата моего, яко благословен еси во веки веков. Аминь (поклон).
Память чуда колива вел. муч. Феодора Тирона
Тропарь, гл. 2
Велия веры исправления, во источнице пламене, яко на воде упокоения, святый мученик Феодор радовашеся, огнем бо всесожжегся, яко хлеб сладкий Троице принесеся: того молитвами, Христе Боже, спаси душы наша.
Кондак, гл. 8 Веру Христову яко щит внутрь приим в сердце твоем, противныя силы попрал еси, многострадальче, и венцем небесным венчался еси вечно, Феодоре, яко непобедимый.
На литургии
Прокимен, гл. 7: Возвеселится праведник о Господе и уповает на Него.
Стих: Услыши, Боже, глас мой, внегда молити ми ся к Тебе.
Аллилуиа, гл. 4: Праведник яко финике процветет, яко кедр, иже в Ливане, умножится.
Причастен: В память вечную будет праведник, от слуха зла не убоится.
