Вечная память тебе, батюшка Герман, Аляскинский Чудотворец, добрый и смиренный труженик и исповедник на Ниве Божией. Тебя не забудет покаянная матушка Русь.
Тропарь, глас 1:
Лозу Православия принесл еси в Америку из России благочестивыя
и, удобрив корень постническими трудами
и напоив обильно молитвенными слезами,
плоды принесл еси – виноград возлюбленный,
Германе преблаженне отце наш.
Тем же и Бог тя прослави, яко апостола преподобнаго,
нетлением мощей и благодатию чудес,
от них же почерпающе благодеяния, восхваляем тя:
слава Давшему ти крепость,
слава Венчавшему тя,
слава Даровавшему тя Америце светило Православия.
Кондак, глас 8-й:
Валаама пострижник,
честный возлюбленник Божией Матери бывый,
ревнитель подвигов древних подвижников новый,
молитву, яко копие и щит, приемый,
страшен демоном и тьме язычестей ставый,
Германе преподобие, моли Христа Бога спасти
души наша.
Стихира, глас 5-й Подобен:
«Радуйся Живоносный Кресте…»
Радуйся Живоносный Кресте,
благочестия непобедимая победа,
Тобою бо отверзеся дверь райская
и даровася новым землям озарение,
и тля идольская упразднися
и попрася смертная держава,
и земнороднии возносятся к небесным.
Радуйтеся вернии и веселитеся,
Яко слава Живаноснаго Креста,
Новых мучеников,
и преподобнаго Германа упование,
в страде новой провозглашается
и всем верным подает
велию и богатую милость.
Стихира, глас 8-ой Подобен:
«О преславнаго чудесе!»
О преславнаго чудесе!
Новая страна освящается,
ибо чудотворец Герман на высоту возносим,
является днесь:
дивен Бог во Святых Своих,
с нами Бог, разумейте языцы!
Православию от отца Германа научитеся,
его же молитвами, Христе Боже,
спаси души наша.
